اسلامی بینکاری میں شرکت کا تصور : مشارکہ اور اس سے متعلّق چندفقہی اشکالات کا تجزیہ (The Concept of Shirkah in Islamic Banking: Musharkah and Analysis of Some Relative Fiqhi Issues)

Urdu Abstract:اسلام کسب معاش کے لیے تجارت کو دوسرے تمام ذرائع پر فوقیت دیتا ہے اور ایسی تجارت کی حوصلہ افزائی کرتا ہے جو پاکیزہ ہو اور اس کی بنا اسلامی اصولوں پر استوار ہو۔ اسلامی نظام معیشت ہر دوبائع اور مشتری کے حقوق کی حفاظتی ضمانت فراہم کرتا ہے اور تجارت جیسی خالص مادی سرگرمی میں بھی ایسے اخلاقی اصولوں کی پیروی کرنے کا حکم دیتا ہے جو فریقین کے درمیان اخوت و محبت کے جذبات کو پروان چڑھانے کا باعث بنتے ہیں۔ اسلام نے تجارت کے لیے جو طرق تمویل (Modes of Financing) متعین کیے ہیں، ان کی فہرست طویل ہے۔ اس مقالے میں اُن طرق تمویل میں سے صرف مشارکہ اور اسکی اقسام سے متعلق بحث کی جائے گی، جسے شرکت کے نام سے بھی موسوم کیا جاتا ہے۔ اس مقالے میں اسلامی بنکوں کے ہاں شرکت یا مشارکہ کے نام سے کیے جانے والے باہمی لین دین سے متعلق مروجہ طریق کار کا فقہی اصولوں کی روشنی میں جائزہ لیا جائے گا۔ اس مقالے کا بنیادی مقصد مشارکہ سے متعلق پائی جانے والی غلط فہمیوں کا ازالہ کرنا ہے ، جیسے اسلامی بینک ، سودی بینک کی طرح نفع کا تعین کرتے ہیں۔ اسلامی بینک میں لین دین کا سارا عمل سودی بینک کی طرح ہی ہوتا ہے وغیرہ وغیرہ۔اس کے ساتھ ساتھ مشارکہ کے حوالے سے چند فقہی اشکالات کا محاکمہ بھی پیش کیا جائے گا، تاکہ شرکت کے اسلامی تصوّر اور اسلامی بینکوں میں اُس کی صحیح عملی تعبیر واضح ہوجائے ۔